تاج جميل من بنوته أجمل

جاني التاج من الجميلة " صبرني يارب "

ويارب اكون ضيفة خفيفه عليكم



أسمك؟

بنت مصر



المشهور بيه وسط اصحابك؟

أيمي



سنك؟

33 ونص



مجال دراستك؟

الكمبيوتر



أسم مدونتك؟

صورة وكلمة

العالم في صور



صورتك الرمزية فى المدونة بتعبر عن ايه؟

عن القرآن ومعاه ورده



هل فكرت فى اغلاق المدونة ؟ والسبب؟

لا انا لسه بقالي شهر بس في التدوين وان شاء الله مش حقفلها

الا لو حسيت اني مش حقدر اقدم الجديد فيها



ايه رد فعلك لو حد قل ادبه فى تعليق ؟

مش حرد عليه ولو لاقيته مزودهل ححذف التعليق



أسوأ مدونة؟

المدونات اللي بتؤذي الشباب مش بتفيدهم



هيحصل ايه للايميل بعد ماتموت؟

حيفضل يتملي لغاية لما يزهئوا وبعدين خلاص

وبعدين اصلا اغلب الايميلات اللي عندي قرايبي فأكيد حيعرفو اني مت



اديت الباسوورد لحد قبل كدة؟

اه جوزي بديله كل ايميلاتي والباسوورد لاني متعودتش اخبي عليه حاجه

حتى لو صغيرة



السفر بالنسبالك ايه؟

متعه وفائده وغربة



الموود بتاعك ايه؟

سمك لبن تمرهندي :)

مش راسي على بر الموود بتاعي

يعني ممكن اكون هادية وفي لحظة الاقيني قلبت فكله يبعد من قدامي



بتعمل ايه في وقت فراغك؟

معنديش وقت فراغ كتير

ولما بيكون فيه بقضيه على النت



الأكلة المفضلة؟

الحلويات والمحاشي والكوسة بالبشاميل اللي بتعملها ماما



الصفات التى اخذتها من والدك؟

اني احط ربنا قدامي في كل خطوة

بابا دايما كان يقولي " يا تعملي الحاجه صح اوي يا ماتعمليهاش خالص"

ودي بصراحة فادتني في حياتي كتير

العصبية

احترام وتوقير الكبير



الصفات التى اخذتها من والدتك؟

احتراااااام الزوج

اني اتعامل مع ربنا في تصرفاتي

حب الترابط الأسري



اكتر ست حاجات بتكرههم ؟

أولاااااااااا: عقوق الوالدين

2- عدم احترام المواعيد

3- الخيانة بمعناها الشامل " الحبيب - الصديق - الأخ - البلد ..... "

4- الكذب

5- عدم احترام مشاعر الأخرين

6- الضعف والتخاذل



اكتر ست حاجات بتحبهم ؟

1- رضا الله وزوجي وضحكة أولادي

2- احترام الكبير وخاصة الوالدين

3- اسعاد الأحرين بصورة أو بأخرى

4- الصدق في كل حاجه في الكلام وفي المشاعر ...

5- ابتسامة حقيقية من طفل يتيمأو بعد الشر مريض

6- تعلم شئ جديد بالنسبة لي



شخصيتك نوعها ايه ؟

رومانسية جدااااا وطيبة لدرجة بتخنقني

بعد ماجبت التلات ولاد بقيت عصبية اوي طبعاااااااا

اجتماعية وبعشق الترابط الأسري



لماذا دخلت عالم التدوين من الاساس؟

صحبتي واختي أحساس طقلة محبة للرومانسية بس واقعية

هي اللي وقعتني في التدوين مع اني ما كنتش في الاول ميالة خالص للمدونات ولا بحب ادخلها اصلا

لكن هي باصرارها المعهود فضلت ورايا لحد ما خلتني اشترك معاها في مدونة صورة وكلمة

ومن هنا بدأت



احلى جملة قيلت فى وصف مدونتك؟

ان فكرتها جديده



اهمية التعليقات بالنسبالك؟

مهمة جدا طبعا لأي حد لأنها بتشجع لتقديم المزيد



حلى بوست كتبته؟ ضع اللينك ثم اذكر لماذا؟

اسمه لعبة الحياه

http://sorawekelma.blogspot.com/2009/03/blog-post_8615.html



لأن المقولة اللي فيها وقفت قدامها كتير اوي افكر في حياتي



افضل مدونة قرأتها؟

مدونة احساس طقلة

مش علشان هي صحبتي

لكن يمكن لأن المدونة رومانسية اوي وكتير بتقول اللي عايزة اقوله

بجد كل موضوع بتكتبه بيعجبني جداااااااااا



افضل بوست قرأته؟

كل بوست رديت عليه بعتبره افضل بوست
يمكن لأني مش برد على حاجه الا لو عجبتني فعلا



الشغل بالنسبالك ايه؟

اثبات للذات واستقلالية مادية ومعنوية

لكن بالنسبة للزوجة لو اتعارض مع البيت يبقى اكيد

البيت هو الأبقى للمرأه " انا عارفه ان الرأي ده حيزعل ناس كتير مني

لكن ده رأيي الشخصي "



الانترنت بالنسبالك ايه ؟

قبل ما اتجوز كان شغلي لكن دلوقتي هو المكان اللي بقايل فيه ناس مش عارفه اقابلهم

والمكان اللي بقضي فيه وقت فراغي



تمرر التاج ده لمين ؟


مدام سلاموني



شكرا ليكم وشكرا يا صبرني يارب على انك اتحتي ليا الفرصة دي